– Buongiorno Pascà! Ma che d’è sta faccia stammatina?
– Buongiorno Gennà! Nun me fa jastemmà ca chillu cazzo e De Luca m’ha scassat’ ‘o cazzo!
– De Luca?! E pecché, che t’ha fatto?
– Ma comme dico io, tu fai sta’ bella penzate ‘e dicere: non più di 20 persone alle cerimonie, feste e via cantanno… ‘o sentuto?
– E comme nò… ‘O fatto che se stai statico a una festa ci possono stare più di 20, se stai circolante non devi superare 20…
– Esatto! Io mò, appena sentette sta cosa… ‘o anema bella Gennà e comme me ciaciaie!
– ‘Overo?! E pecchè?
– Nientemeno?! Sabato cajnatemo fa ‘a primma cummunione da’ figlia?! Aveva pigliato nu ristorante a Gragnano… 110 invitati…
– Pe’ na primma cummunione?!
– Eh… chill’ ‘è scemo, isso e ‘a mugliera! Allora io penzaje subbeto “sicuro io nun ce trase int’ ‘e vinte”: 4 nonni + lloro duje e tre figli + ‘a cummare da’ criatura ca se fa pure ‘a cresema, co’ marito e dduje figli… E stamm’ ‘a tredici. Po’, miettece ‘o ndiano ca sta sempe appriess’ ‘a mio suocero ca chille nun sta tanto per la quale… 14! Rimanevano 6 posti. Mò, ‘a mugliera ‘e cajnatemo tene un’amica ca stanne sempe ‘nzieme da quanne so’ criature. Sicuro a chella l’aveva ‘nvità: n’ati 4! E te pare ca chill’ati posti liberi attuccavano a me?! Impossibile: io, mia moglie e tre figli… sballavame! Infatti, quanne turnaje ‘a casa ll’ata sera, mia moglie steva già tutta ‘nturcinate. “Vuò verè ca chella ce scancella proprio a nuje da’ festa?!” dicette nun manco mettietto pere int’ ‘a casa. Io facevo finta pur’io e sta nervoso, ma ‘ncapa a mme penzave: aggio pigliat’ ‘o terno, ca io me scassavo proprio ‘o cazzo a ij ‘a cummunione.
– Ah pure a mme sti cose me fanne venì appucundria!
– Bravo! Io avesso pavate ‘a n’ato po’ fa ij ‘o posto mio! Comunque pe nunn’ha fa longa è stata ‘na nuttata ‘e mmerde, cu Maria ca diceva sempe ‘a stessa cosa: “chillu strunzo ‘e frateme… chillo se fa mettere ‘e piere annanze da mugliera… isso avessa dicere: sorèma c’hadda sta pure a costo ca vene De Luca in persona e ce fa chiudere ‘a festa!”
– E tutte chesto senza ca sapeva ancora sì a scancellavano o meno?!
– Bravo! ‘A matina appriesso chiammaje ‘a mamma. ‘O anema bella e che tiatre! Ca s’era accattate ‘e vestiti pe’ essa e i figli…
– E tu niente?! Nun te l’avivo accattate ‘o vestito nuovo?
– Macchè… io tengo uno vestito ca l’ause pe’ tutte ‘e cose ca me ‘nvitano… Me l’accattaje po’ viaggio e me metto sempe chillo! Comunque tutto nu giro ‘e telefonate ‘a jurnate d’ajere pe’ venì a capo ‘e sta cosa… Figurate ca screvette pure sott’ ‘o facebook ‘e De Luca: “questa decisione non è giusta. voi governatore così mettete a rischio l’unità delle famiglie. frate contro a sorelle, mariti contro le mogli. fate nascere contrasti, divisioni, arrevuoti. non me l’aspettavo da voi. ripigliatevi!”
– Azz mugliereta è ‘nzista?!
– Eh e che t’ho dico affà! A casa pareva ca stevo nu lutto ‘ajere… Io facevo finta e sta ‘ncazzato… Ma ogni tanto me scappave a ridere… Po’, bell’è bbuono, ajere sera chillu cazzo e De Luca s’ha rimangiato tutte cose?!? Mannaggia ‘a capa soja! Ha levato ‘o limite de’ 20 persone… “Facite festa, ma stateve accorto”! E grazie ‘o cazzo! Mi è crollato il mondo addosso Gennà!
– E vabbuò Pascà, meglio accussì se no è capace ca po’ mugliereta s’appiccicava co’ frate!
– Eh, intanto mò me tocca! E aggià fa finta pure di essere cuntento!
(il barista si avvicina per togliere tazzine e piattini)
– Neh, ma che ve state cunfessanne stammatina?! Forza ca le consumazioni devono essere rapide… Non occupate posti al bancoooo! Circolareeeee…