– Gennà e tu nun stai in ferie?
– Sì, ma nun so’ jute ‘a nisciuna parte… Ce stamm’ ‘a casa Michè! Chist’anno niente ferie.
– Gesù e pecchè?
– Azz tu me l’addimande pure?! Nun ce vaco pe protesta. Nun m’hanno date ‘o bonus vacanza… A me?! Scusate, ma sì nunn’ ‘o date a me a chi ce l’avite date stu bonus vacanza?! Ja, faciteme capì!?
– ‘Ncopp’ ‘a stu fatto hai ragione Gennà! Cca tutti hanno fatt’ ‘a domanda pe’ nu bonus! Sul’io nun so’ stato cazzo ‘e me ‘mpizza int’ ‘a una e sti cose che ha fatto ‘o guverno!
– Figurate! A me ancora m’hanna pavà ‘a cassa integrazione ‘e giugno. Ca po’, proprio venerdì, parlanno cu l’architetto ca venetto ‘ncopp’ ‘o cantiere, chillo se fa ascì ca pur’isso s’è pigliato e milleuro pe’ partite iva! L’architetto Michè, ca chillo è ommo ca guadagna 70-80 mila euro all’anno!
– Ma pecchè tu nunn’e ‘ntise ‘o fatto e ‘sti cinche deputati ca avevano fatto ‘a domanda pure lloro?
– Zitto Michè… Nun me dicere stu fatto ca io quanne l’aggio sentuto aggio ditto a muglierema, “appriparete ca jamme a Roma!”
– E che vulive fa?
– Me mettevo annanze ‘o parlamento cu na vrancate e dieci centesime int’ ‘a burzetta ‘e muglierema e a ognuno e loro ca passava ‘nce menav’ ‘appriesso ‘na chiorma!
– Eh, accussì t’arrestavano proprio!
– (il barista) Ecco qua i due caffè! Uno schiumato e l’altro amaro… Comm’ ‘a vita miaaaa!
– Michè e cca tenimmo pure ‘o filosofo stammatina!
– Stamm’ ‘apposto Gennà. Avimma sulo murì.