– Uè ‘a quanto tiempo ca’ nun te fai cchiù verè! Comme stai?
– Eh, hai ragione… ma chist’è nu casino. So’ impegnato assai!
– ‘Overo?! E che stai facenno?
– Eh… Aggio fatto primmo ‘a domanda po’ reddito ‘e cittadinanza a figliema ‘a femmena: cagn’ ‘a residenza, vai ‘o patronato… Te fanne ij ‘annanze e areto… Che t’ho dico affà! Se n’è zumpata cchiù ‘e ‘na semmana. Po’ m’ha itto ‘o tipo llà, facitela pure po’ uaglione! E allora fa tutto da’ capa po’ masculo, ca chillo mò ha fatto diciotto anni. Me penzavo ca era fernuta, ma po’ l’amico ha itto “e pecchè nun faje ‘a domanda pure pa’ signora toja?!”
– Ma pecchè tenesse diritto pur’essa?
– Comme stanne ‘e cose, no. Ma chillo ha itto: “guardate, ccà nunn’è ca se fanne tanta controlli, nunn’è ca ‘e ponno fa po’ primmo d’aprile. Vuje facitele, po’ se vere!”. Michè, a massimo nun l’accettano!
– E hai ragione… si sapevo ‘a facevo pure pe’ mia moglie!
– E nunn’è mica fernuta! Piglia ‘e fa’ ‘a domanda pe’ mamma! ‘A penzione ‘e cittadinanza! Michè chella piglia 420… Si le danne ‘a penzione ‘e cittadinanza a 780, tu ‘e capito ca chella cagna d’accussì a cussì… (volta il palmo della mano)
– Eh certo! Ca po’, 420 comme se fa ‘a campà, jà?!
– E perciò… Avevana fa primma sta cosa pe’ penziunate! Ma chillo ‘o patronato ‘a itto: ”ce stanno poche risorse”… Boh, speriamo bene! Certo, si ce danne l’aumento a mamma vaco buono pur’io!
– E vabbuò, mò ‘e fernute cu tutti st’impegni! N’atu pare ‘e summane è tutto…
– (lo interrompe) Macchè, aggio fatto pure “quota 100” pe’ me!
– Quota 100?! Pascà, ma tu nun tiene l’età mia?
– Classe 1959! A settembre so’ 60!
– E comme fai a fa quota cento?
– Oooh Michè, già ca me truvavo facenno me so’ purtato ‘annanze co’ lavoro!
– (il barista) Uno poco zucchero e uno schiumato prontiiii!