– Neh ch’è stato? Stammatina stai nervoso?
– Uh meglio ca nun t’ho dico! Lasciamme sta!
– Ah, ma allora ‘o fatto è serio!?
– Sempe muglierema… Sempe essa ca me ‘ntosseca ‘a jurnata!
– Ma pecchè c’ha fatto?
– Sta uno ca tene cu essa l’amicizia ‘ncopp’ ‘a fesbuk… Uno ca io ‘o saccio pure… Uè, chiste ogni cosa ca scrive, essa mette “mi piace”… E vabbuò, fin qua nun fa niente! Però, chisto appena scrive ‘na strunzata, chella…
– …mugliereta?
– Eh, muglierema… è ‘a primma ca le mette ‘o mi piace… Ma sai quanta vote ce l’aggio itto: “Ma che miett’ ‘a chisto tutti sti mi piace ca nunn’ ‘o fai manco fernì ‘e scrivere?!”. Niente…
(il barista da dietro al plexiglas/s)
– Pronti i caffè… e facimm’ ‘ambressa ca bisogna circolare davanti al banco!
– Sì nunn’ ‘a fernisce mò vaco a piglià a n’ata parte ‘o cafè ‘a matina…
– Gennà nunn’ ‘o sfruculià ca sta nervoso Pascale stammatina…
– Eh sto nervoso sì… Ma tu ‘e capito ca chella stammatina c’ha mise proprio ‘o cuore!? Chill’ ‘a scritto ‘na specie ‘e poesia e chella c’ha mise ‘o cuore… Ma secondo te comme aggià sta?!