– Uè stammatina l’he fatta ‘e notte!?!
– Eh! So’ caruto do’ lietto!
– Ch’è stato!?
– M’hanno citofonato ‘e sei… Ma ‘na sfaccimma ‘e citofonata longa ca io ‘e muglierema avimmo sbandato… “Cirù, ‘e carabbiniere!” ha ditte essa ca’ faccia janca. Macchè Terè ‘e carabbiniere venev’ ‘o lato de’ quatte e po’ che veneno a fa a casa nosta?!”. “E po’ essere ca oggi è dummeneca, se l’hanno pigliata cu calma!”.
Appena ha ditto “…è dummeneca…” subbito aggio penzato: saranno ‘e testimoni ‘e Geova!
– A chell’ora?!
– Infatti, pure Teresa ha ditto: “Cirù ma ‘e sei nun so’ mai venuti ‘e sei, è troppo ambressa!”.
E allora ce simmo guardate ‘nfaccia senza ce dicere niente… ‘A verità, Tonì, m’é venuta l’ansia!
Po’ muglierema cu nu filo ‘e voce ha murmuriato: “Cirù, fa ca è isso!?”
– Isso… isso?!?
– Eh… Isso Tonì! Putev’essere. Sott’a mme ce sta Whang, ca nuje ‘o chiamammo Gaetano, ma isso è cinese… Aggio ditto ‘a muglierema: “Vuò vedè ca chillu strunzo vuleva citofonà a Gaetano e ha citofonato a nuje?!”
– E ch’è fatto?
– Niente, c’aveva fa?! “Terè – aggio ditto ‘a muglierema – nun dicimmo manco ‘na parola, nun rispunnimmo… nun respirammo! Facimme ammenta can un ce sta nisciuno… Accussì chillo ‘ajza ‘ncuollo e se ne va”.
– E se n’è jiute?
– Sì, ha sunato n’atu pare ‘e vote, ma nuje zitto… ce simmo mise ch’ ‘e cape sotto ‘e cuperte ca a n’atu poco soffocavo! Ma se n’he jiute alla fine, ringraziann’ ‘a ddio!
– Ma tu vire si uno po’ passà nu guaio ‘e chisto ‘a dummenca matina!?
– Infatti, hai ragione. E si chiste piglia st’abitudine ‘e venì a citofonà a casa da’ gente è nu cazzo ‘e guaio. Primma passa isso: “Siete spacciatore? Tenite ‘o virus? Patente e libretto?…” Po’ se ne va isso e arrivano chill’ate: “Lo sapete che verrà la fine del mondo?” Voi vi state preparando?”
– Ehhh ma accussì nun se campa cchiù! Che putimme fa Cirù?
– E che vuo fa Tonì?! Pigliammece ‘o cafè… è l’unica soddisfazione ca ‘nce rimasta!