– Pascà, ma tu stai sentenno ‘e tutti sti positivi ca ce stanno n’ata vota?
– Eh… ma dice ca è tutta gente ca s’è fatta ‘a vacanza all’estero e po’ so’ turnate ccà! Però Gennà so’ focolai ha itto ‘a televisione.
– E che significa?! Tu comme faje a sapè sta gente a chi è ‘ncuntrato?! Ca po’, dico io: c’avevano ditto ca chist’anno ‘a vacanza s’aveva fa in Italia p’aiutà il turismo italiano?! Ma vuje che cazzo ve ne jate ‘a fa all’estero?! Mò fa ca ‘a Grecia, Malta e cumpagnia bella ce stanno posti cchiù belli e ll’Italia?!
– C’avevano mise pure ‘o bonus pe’ ce fa spennere all’Italia!
– Niente! E all’inizio se facettene pure ‘attenere… Ca Di Maio avetta ij tuorno tuorno a ‘sti paise ca avevano chiuso all’italiani, pe’ dicere: “uè guardate bbuono ca nuje nun vo’ purtamm’ ‘o virus!”
– E certo chill’ ‘o tenevano già pe’ fatte de’ lloro!
– T’aggia dicere ‘a verità?! Io nun ce capisco proprio niente cchiù! Comme, nuje simme state tre mise chius’ ‘a into, nunn’appena verimm’ ‘a luce do’ sole vuje che penzat’ ‘e fa?! Ve ne jate all’estero?! Che ciavatte, tutte sudate, ca’ lente po’ sole, ‘o pantaloncino azzeccate ‘ngulo… Ma statev’ ‘a casa!
– ‘Na bella vacanza di prossimità…
– Bravo, ‘e ditto juste… Io accussì aggio fatto: me so’ accattate ‘na bella piscinetta gonfiabile e l’aggio mise for’ ‘o terrazzo pe’ criature. Ogni tanto ce vuttamme pur’ ‘io e muglierema… Cchiù prossimità e chella!