– Famme nu cafè, oj!
– Addò vai accussì ‘e notte?
– Port’ ‘e criature a fa nu bagno for’ ‘a litoranea! Da oggi sto in ferie: ‘na croce. So’ sciso ca penzavo ‘e nun truvà a nisciuno mmiez’ ‘a via… bollino nero, bollino nero… e chille stanno tutti quante ccà!
– So’ ‘e denari ca mancano… chi addà ij a ‘sti ferie!?!
– Boh, che t’aggia dicere! Io saccio ca mò, stammatina comm’ ‘a niente ‘a cinquanta euro se ne va! ‘A benzina, l’autostrada, ‘o parcheggiatore all’anema ‘e chill’ ‘è vivo: cinque euro pe’ mettere ‘a machina ‘o frisco! Po’ ‘o gelate… ‘o cafè nun t’ho piglio?! Muglierema ca sempe ‘na strunzata s’addà accattà int’ ‘o nero ca passa… Vire tu! ‘Sta semmana chesto me tocca!
– E nun te cunviene ‘a te ne ji ‘abbascio ‘a custiera, ‘o posto d’arrivà for’ ‘a litoranea?
– Seh… e comme c’arrivo ‘a custiera?! Aggia partere ‘e sei ‘a matina! E po’ e capito ca ‘nce vonne tre euro all’ora po’ parcheggio… sì ‘o truove! Vaco addà vinte, vinticinque euro a loro pe’ me fa nu bagno? Dicette cu muglierema, mò v’accatto ‘na piscinetta, va metto for’ ‘o balcone e avite voglia e ve fa bagni!
– E pure dice buono!
– Sarebbe ‘a meglia cosa… ‘O spiaje pure all’amministratore: facimmo ‘na cosa apperune, accattammo ‘na bella vasca grossa e facimm’ ‘a piscina condominiale! Me facette ‘na risata ‘nfaccia, ‘o scemo! Io me mettevo ‘a copp’ ‘o balcone, ‘o frisco, ‘ncopp’ ‘a seggia sdraio, guardavo ‘e uagliune e me leggevo ‘o giurnale… Cheste sì ca erano ferie!
– È pronto il caffè!
– (al barista) Uagliò e vuje in ferie nun ghiate?
– Seh, in ferie! Chillo nun vuleva ‘sta chiuso manco a ferragosto! (a bassa voce) ‘stu scemo!
– Schiavi, siete schiavi… ‘e ferie so’ necessarie… Ve toccano e l’avita fa! Vire a me… Ahhh, sto’ tanto bello rilassato stammatina! Mò me metto int’ ‘a machina e me faccio nu pare d’ore p’arrivà a chillu cazzo ‘e mare, cu ‘e criature ca s’appiccicano, muglierema ca vo’ sentì a Sal da Vinci a tutto volume… e io ca jastemmo! (ci riflette, dopo il primo sorso di caffè) Nhe, ma me vulissevo a faticà cu vuje sta settimana?!