-Neh e ch’è fatte? Tiene ‘na faccia!
-Nun mm’ho dicere, ‘sto ascenno pazzo.
-Ch’è stato?
-‘O anema da dummeca ‘o juorne nun aggio capito cchiù niente: fernesce ‘a partita, currre a casa, puose a bandiera ca c’avimme salvate, piglia a bandiera de’ 5 stelle e curre in piazza pecchè avimme fatto ‘o guverno…
-Eh, l’avive fatto cu’ chillu strunzo ‘e Salvini…
-Sì vabbuò, lascia perdere… chillo è sulo ‘nu cuntratto mica nu guverno! L’ha spiegato tantu bello Di Maio, allora nunn’’o vuò capì proprio?!? Mentre ca stamme llà tutte cuntenti, niente… ‘o guverno nun se fa cchiù… E comme cazze è succieso?!?
-Pe’ vie ‘e Savona… ca po’ chi cazze sarebbe stu Savona?! Tu ‘o cunusce?
-Ma nu’ viecchio… chi cazz’’o sape… ‘o fatte sì stà che Mattarella s’è mise ‘e travierse
-Secondo me tene coccose contro ‘a stu Savona… ‘na cosa tra viecchi
-Eh sì l’aggio penzate pur’io! Comunque… tuorne ‘a casa… puose ‘a bandiera de’ 5 stelle e miette ‘o tricolore ‘appise ‘o balcone pecchè accussì ha itto Di Maio… Po’ Meloni dice, impicment… e pure Giggino, impicment… allora va truove ‘ncopp’’o vocabbbolario ‘e figliema comme se scrive stu impicment… e scrive ‘ncoppo a facebook… Aggio state tutta a nuttata ‘ncoppe llà… “Mattarella traditore del voto degli italiani” aggio scritto! Po’ è asciuto chell’ata cosa… cumm’era…. Ah! il mio voto conta… (ride) Te vuò fa’ ‘na risata… Aveva scritto: il mio voto canta… e menu male ca n’atu grillino ‘e Puortece se n’è accorto: m’ha scritto sott’’a bacheca… sei un fascista, stai con Mattarella, devi fare una brutta fine tu e lui… Aggio itto… ma chiesto è scemo?!? Che cazzo va truvanne?!? Amico, gli ho scritto, guarda che questa bacheca è seria, se continui ad insultarmi ti segnalo alla polizia postale! Isso ha risposto… sì ‘nu strunzo… Vuò cantà mò che Mattarella s’è fumato ‘o voto mio?! Voglio cantà?! Nooo io voglio cuntà! Sì scemo allora… acconcia st’astagga che ll’è sbagliata! (ride) Accussì me so’ accorto e l’errore…
-Pronto il caffèèèè…
– Fa na’ cosa, purtancell’’o tavuline ca chille ‘o fatte è ancora luongo!
-Ma io aggià faticà…
-cinque minuti…. Assettammece!
-Oooohhh e ch’è fatte stammatina?!? Chest’è ‘na ciofeca proprio!
-(barista) È ‘a vocca toia ca’ stammatina tene ‘o fele ‘mmocca…
-E pe’ forza! Chille l’hanne ‘ntussecat’ ‘ o guver… ‘o cuntratto (ride)
-E che ride ‘a fa?!? Mattarella nun tenev’’o diritto e vuttà ‘o voto mio int’’o cesso!
-Guarda ca chillo ero nu’ dovere… è ‘o presidente…
-Sì vabbuò sì scemo pure tu! Io l’aggio scritto pure int’’a bacheca ‘e l’articolo 92; comunque Giggino dice: tutti a Roma il 2 giugno! Io avevo prumise ‘a muglierema da’ purtà Agropoli pe’ vedè qualche casarella pa’ staggione… e l’aggio ditto: amò, s’addà ji a Roma sabbato… nun putimm’ij Agropoli. Tu ‘e capite ca ‘o mumento è grave?! Chiste vonne piglià ‘a costutuzione e sa mettene sott’’e piere… Tutti a Roma!
-E mugliereta?
-Ha itto… vafanculo! A te e a Mattarella!
-Ma che ‘nce jate a fa ‘a stu Roma?!
-Per far capire ai poteri forti che il voto degli italiani conta! Ma senza manifestazioni violente ha itto Giggino…
-E certo! Pure pecchè chelle sfilano ‘e forze armate sabato! Nun ve cunviene e fa ‘e violenti…. V’arricettano, a te e a Giggino!
-Comunque, torna figliema da’ scola e dice… “papà ho letto sul tuo profilo che sai da’ costituzione?! Io nun m’ho immaginavo! Allora ‘o compito m’ho fai tu?” “‘O compito?! Che compito bell’a papà?!” “All’esame ‘e stato… dice ca siccome so’ 70 anni che l’hanna fatta po’ essere ca esce ‘o compito ‘ncopp’ ’a costituzione.” “Vabbuò po’ vedimmo ’a papà…”
‘Aieri ‘o juorno ‘ncopp’’o gruppo e whatsapp scrivono… “Preparate le bandiere, stasera tutti a Napoli con Di Maio” “Ma quale?” l’aggio risposto “chella ca tengo for’’o balcone?” “No quella lasciala appesa… porta quella dei 5 stelle!” “Obbedisco!”
-E sì jute a Napoli?
-E per forza! Ma tu ‘e visto a chillu tedesco cu chella faccia… proprio tedesca brutta ca s’è permise ‘e dicere “v’insegno io come si vota!” Bisognava andare per forza… ‘o spleed saglieve…
Po’ ‘e bell’e bbuono, arravuoglie! Cottarelli se ne và dal Quirinale… l’elezioni a luglio… Meloni ca dice: “parte la raccolta firme per le dimissioni di Mattarella” … ‘o anema pareva ca n’atu poco scuppiav’’a guerra! Fra di nuje ce l’avimme pure itto dinto ‘o gruppo… è guerra!
-Tu ‘a guerra ‘a tiene ‘ncapa secondo me…
-Po’ ‘aiere sera Giggino dice… niente impicment pe’ vie ‘e Salvini… “pavido” ha itto Dibba… e l’ha trattate! Levate ‘o tricolore do’ balcone… Aggio scritto ‘a muglierema “Marì va leva ‘a bandiera a fore ‘o balcone!” e chella m’ha risposto “Già fatto, aveva stennere ‘a lavatrice!”
-Te sì truvate nu servizio fatto!
-Bravo! Mentre ca torno ‘a casa… leggo ‘ncopp’’a twitter ca Di Maio dice “Non si vota più, caro Presidente noi siamo pronti per il governo” Comme caro presidente? Meloni dice “Caro presidente per il bene dell’Italia anche noi in maggioranza” … Allora aggio cagnato aggio scritto l’astagg io sto con Mattarella… forse… po’ vedimmo!
-Uagliò ma nun te pare che ‘avite perzo nu poco ‘a capa?!
-Giggino ha mise ‘na bella fotografia ‘annanz’’a ‘na piezz’’e pizza… tutto sorridente! Ho pensato… allora ‘e cose stanno bbone…. Me so’ fermate int’’a pizzeria e me so’ mangiato ‘na pizza pure io! Mò oggi vedimmo che succede.
-Vabbuò io vaco ca s’è fatto tardi! Statte bbuono
-Statte bbuono e mi raccomando… io sto con… vabbuò… Ce vedimmo!
30 maggio 2018