CASSA DEL SUPERMERCATO
– Ossaje ‘a Natale me ne vaco!?
– E addò vaje?
– ‘Nta figliemo, ‘a Germania!
– Brava! Vaje ‘a fa Natale cu isso? Tu e mariteto?
– Sì… so’ tre anni ca nun veco ‘e criature.
– Faje bbuono… Te fai Natale cu lloro!
– Ehhh e mica sulo Natale! Parto ‘o ventritrè; faccio Natale, ‘o primm’ ‘e ll’anno e ‘a befana!
– Azzò ‘e faje stu bellu regalo!?! E comme jate?
– Cu l’arioplano! M’ha fatto ‘e biglietti figliemo stesso da’ llà… Nun so’ mai jute ‘ncopp’ ‘a l’arioplano… ‘A maronna ‘e Pumpei me prutegge!
– E comme no! Tu vaje pe’ cose bbone…
– Me passaje ‘a mugliera pe’ telefono ‘e dicette… ca io nunn’ ‘a manco capisco bbone ca chella parla tedesca ammiscato cu l’italiano… “Mamma vi dovete portare la pelliccia che qui fa freddo tanto”! “Bell’ ‘e mamma ‘addu ‘a piglia sta pelliccia ca ccà fino a jeri stevem’ ‘a mmeza manica”… “Ve la comprate, ci vuole…”
– Se ci vuole Terè… ci vuole!
– Sì ma quanto costa ‘na pelliccia, Marì?
– E che ne saccio?! Penzo ca cchiù ‘e cinqueciento euro sicuro!
– Eh… è ‘na parola! Mò se ne zompa tutt’ ‘a tredicesima da’ penzione… Po’ aroppo che me ne faccio sta cazz’ ‘e pelliccia quanno vengo ccà?! ‘A metto ‘a fa ‘a muffa?
– E po’ ‘a mariteto non ci vuole la pelliccia?! T’ho puorto co’ cappotto?!?
– Ehhh ‘a pelliccia… chillo votte sempe calore… ‘A isso niente pelliccia! Teno chillu bello cappotto cammello ca s’accattaje nu pare d’anne fa… Nun so’ metto maje! A lui non ci vuole ‘a pelliccia!
– Jà jà vuott’ ‘a robba ll’oco ‘ncoppo ca ce ne jamme! Ma ‘a Germania ‘e fanne chelli belli funzione ‘a chiesa ca facimmo ccà?
– Boh… speriamo… ca si nò che Natale è!?!