– Certo ca stu fatto ce sta nu poco facenne ji ‘o manicomio!
– Eh Pascà, ma sai pecchè?! Pecchè fino do’ primo mumento, io aggio capito ca nisciuno aveva capito niente e stu virùss. Pure sì ‘e sentiv’ ‘e parlà int’ ‘a televisione, ognuno diceva ‘na cosa.
– E pecché mò nun fann’ ‘o stesso?! “Il virùss si è indebolito”… “Il virùss circola di più”… “No, circola di meno”… “Nossignore è ca piglia i giovani…” “Sì, ma moreno ‘e viecchi…”
– Hai ragione Gennà! Cierti vote me danne l’impressione ca parlano e stu cazzo ‘e virùss comme sì fosse ‘na perzona! Si è indebolito?! E allora chiavammele tanta mazzate e stennimmele ‘nterra! Comme ‘a pienze tu?!
– Chillo ce sta stennenno isso a nuje, Pascà!
– Ca po’ è stu fatto degli asintomatici ca a mme me fa ji ‘nfreve! Tu ‘ncuntr’ ‘a gente ca sta bene, nun tene niente… s’atteggia, parla, ride… e vaje verenno! Ten’ ‘o mariulo ‘ncuorpe… e t’ammesca! E tu passe nu guaio.
– Muglierema l’ate juorne, nella sua ignoranza, dicette ‘na cosa regolare… “Ma stu virùss, Gennà, non poteva essere come alla rosolia, al morbillo, ‘o fuoco ‘e santantonio?! Ca uno vedev’ ‘e macchie pe’ ncuollo e se stev’ ‘a casa… E se non si voleva stare a casa pecchè tenev’ ‘a capa ‘e mmerde, quando uno di noi lo incontrava per strada ‘o jeve fujenno: uè bellu uagliò, vide addò puorte stu virùss… fatte a llà!”
– ‘O anema Gennà, e chella tene proprio ragione…
– Ah ‘o fatt’ ‘e chesto, muglierema nunn’ ‘azzecca una, ma ogni tanto è cassazione! Pe’ chest’ ‘a voglio bene. Jammuncenno ca sì no facimmo tardi!