– Uè Pascà e tu già stai ccà?!
– Sì sì, so’ turnate ‘aiere matina… Guarda nun c’ha facevo cchiù! Muglierema sta comme ‘a pazza: “Ma tu sei proprio un incosciente, jettamm’ ‘e sorde accussì… Altri due giorni a Capri pagati e nuje ce ne jamme?!”
– Stavota nun le pozze dà tuorto Pascà… Ma pecché te ne sì turnato?
– Gennà, a parte ca se steva cchiù azzeffunnati ‘e Maiori, ma po’ m’ha fatto ji ‘nfreve ‘o fatto da carta ‘e credito!
– Che fatto?
– Gennà aveva pavà tutto co’ POS, pure ‘o cafè!
– Niente meno?!
– Eh… ‘e sigarette… Tutto!
– Ma fanno ‘na speculazione allora cu ‘stu pos! Vabbuò si’ ja spennere due-treciento euro, ma po’ cafè… Chillo ce vonne fa’ levà ‘e sorde ‘a mmiezo. So’ ‘e banche, ca tu t’è fa’ a carta ‘e credito… e lloro… po’ po’ ce guadagneno!
– Sì ma mò nisciuno se piglia ‘e commissioni… A me ‘a carta ricaricabile me costa 18 euro all’anno…
– Embè, tu fa 18 euro pe’ tutti l’italiani e vide quanta miliardi ‘aesceno…
– Sì ma llà sai che dicevano?! Ca ‘e sorde nunn’ ‘è putevano tuccà… Po’ fatto do’ coronaviruss. “No e mi dispiace… Io poi prendo i soldi vostri e poi devo toccare ‘o cornetto, ‘a zeppola, ‘o tramezzino…” me dicette ‘a signurina do’ bar…
– ‘O anema! Chiste fanne addò vedeno e addò cecano!
– Eh, proprio accussì… Guarda m’aggio esaurito… E ‘a verità, avevo fernuto pur’ ‘e sorde ‘ncopp’ ‘a carta! Perciò… dietrofront. Ma però Capri è bella, eh! Dduje, massimo tre juorne pe’ gente comm’ ‘a nuje se po’ fa… Non di più!
(il barista poggia le tazze sui piattini)
– Pronti i due caffeeeeè…
– Uè tu devi essere più gentile… Parla zittu zittu… Non devi disturbare i clienti! Sei mai stato a Capri?
– Nossignore!
– E ci devi andare… Accussì te ‘mpare comme s’agisce int’ ‘a nu bar di un certo livello!
– Va bene, state servito…
– Nun fa’ sempe ‘o scemo! Ah, guarda ca io da’ stamattina in poi ‘o cafè t’ho pave ca’ carta.
(il barista si ferma, lo guarda in silenzio perplesso)
– Sai che vuò fa’ Pascà?! ‘A matina te l’offro io ‘o cafè… E ca si no, fermate a t’ho piglià ‘a n’ata parte ‘o cafè ‘a matina! Liberiamo il bancoooo… avanti!